Oleh: Gampang Prawoto
udane ngreceh
sing payu ming duit receh
duit ungkul brukut mancal kemul
duit gembel padha kempel guwel
mbacutake katrisnan kang karahinan
Kabuyak kluruke sang diwangkara.
wengi panggah nyimpen sepi
raket repet rapet kayadene wewadi
madyanig ratri nunggak semi
ati lan ati angganda wangi
ngudhuk pangangen mekar kekareban.
udan sangsaya deres
wengi ngumbar dhedhet
udhet udhet sansaya singset
enggal suntaken sungkawa
sungkawa reridhuning laku
kamangka papan lan empan
iku kekareban kekareban
kang durung mapan
mumpung rasamu lagi lodhang
mumpung srengenge isih sesingidan
aja was, aja sumelang
uwalana sakabehing panandang
bali ngancik alam bebrayan
bareng tekaning padhang
jingglang.
Sastrowidjojo,19012022
*)Foto : Model (ArumSekarDewiWulan)
